Að blómstra í breytingum

Iðan fræðslusetur er þátttakandi í MCEU þróunarverkefninu (Upskilling the EU Hospitality Industry with Portable Micro-Credentials) ásamt átta öðrum aðilum. Verkefnið er fjármagnað af KA2 – Erasmus+ styrkjaáætlun Evrópusambandsins  og miðar að því að þróa örfræðslu og gefa út örviðurkenningra (e. micro credentials) í því skyni að styðja við símenntun og viðbótarþjálfun (e. upskilling) starfsmanna í hótel- og veitingageiranum. Í verkefninu er sérstök áhersla lögð á fræðslu sem tengist grænni og stafrænni umbreytingu.

Þriðjudaginn 29. apríl sl. fóru fram hringborðsumræður á vefnum þar sem m.a. var fjallað um helstu niðurstöður viðamikillar könnunar sem framkvæmd var í tengslum við verkefnið. Könnunin náði til rúmlega 3.800 fagaðila í ferðaþjónustu í 31 landi og leiddi m.a. í ljós að grunnhæfni, eins og að takast á við kvartanir, eftirlit með starfsfólki og gæðaeftirlit eru enn í forgangi. Hins vegar er stafræn færni og þekking á sviði sjálfbærni vanmetin af mörgum fagfólki þrátt fyrir aukna áherslu vinnuveitenda. Hringborðsumræðurnar voru vel sóttar og fyrir þá sem áhuga hafa er hægt að horfa á þær í heild sinni í meðfylgjandi myndskeiði. Hér verður svo stiklað á stóru um nokkrar helstu niðurstöður.

Helstu niðurstöður

• Það verður að laga menntun að þörfum iðnaðarins. Craig Thompson, forstjóri THE-ICE, lagði áherslu á að menntun í ferðaþjónustu þróist í takt við breytingar í iðnaðinum. Pascaline Hazart frá Accor Academy lagði áherslu á nánari samstarf á milli háskóla og iðnaðarins til að tryggja að nemendur útskrifist með viðeigandi þekkingu og færni.
  
• Sjálfbærni og stafrænar umbreytingar hafa mótandi áhrif á það hvernig hótel og veitingastaðir starfa í dag. John Lohr frá Dusit Thani College lýsti vel heppnuðum verkefnum sem tengjast sjálfbærni og krefjast þátttöku starfsfólks. Pascaline Hazart lagði áherslu á að gera sjálfbærni og stafræna hæfni áhugaverða fyrir starfsfólk.
• Krumma Jónsdóttir lagði áherslu á mikilvægi þess að rækta rétt hugarfar samhliða formlegri þjálfun. Tilfinningagreind, aðlögunarhæfni og leiðtogahæfileikar eru nauðsynlegir fyrir fagfólk í ferðaþjónustu ætli það sér að blómstra í breytingum. Aðferðir til að stuðla að ævilöngu námi fela í sér örþjálfun á vinnustað, þverfaglega þjálfun og viðurkenningu fyrir þátttöku í starfsþróun.
  
• Örviðurkenningar hafa mikla möguleika fyrir ferðaþjónustugeirann, en það verður að vanda til við innleiðingu þeirra. Örviðurkenningar verða að vera til þess fallnar, að efla formlega menntun og þjálfun á vinnustað. Á hringborðinu benti Craig Thompson á að örviðurkenningar verði að vera notendamiðaðar og viðurkenndar af iðnaðinum. Gerard du Plessis lagði áherslu á sveigjanleika þeirra og möguleika á því að uppfæra færni starfsfólks í smærri skrefum.

Hringborðsumræðum MCEU lauk með skýrum skilaboðum. Framtíðarárangur í ferðaþjónustu byggir á traustu samstarfi milli fræðsluaðila, fagfólks og iðnaðarins.  Öflug símenntun, aðlögunarhæfni og vilji til að tileinka sér nýjungar eru allt þættir sem skapa bjarta framtíð.