Fyrsti íslenski bifvélavirkinn tók þátt í Evrópukeppni ungra iðnaðarmanna EuroSkills sem fram fór í Herning í Dannmörku dagana 10-12 september.
Adam Stefánsson, 24 ára bifvélavirki sem starfar hjá Bifreiðaverkstæði Högna í Hafnafirði var valinn síðasta vor til að fara út og keppa fyrir Íslands hönd. Í sumar fóru fram stífar æfingar undir handleiðslu Sveinbjörns Björnssonar sem var einnig svokallaður „expert“ á keppninni, sem er einskonar dómari. Undirbúningurinn fólst meðal annars í því að æfa bilanagreiningu, stilla ADAS myndavél, vinna við rafbíla, hjólastilla og mæla upp og meta vél.
Keppnin var mjög krefjandi og skiptist upp í 15 verkefni og höfðu keppendur um 1 klst að leysa hvert og eitt. Adam stóð sig mjög vel, sérstaklega í ljósi þess að Ísland hefur ekki keppt í þessari iðngrein áður og lenti í 12. sæti af 18 þátttakendum með 678 stig og rétt rúmlega 40 stigum frá verðlaunapalli, en mest er hægt að fá 1000 stig.
Keppendur frá Íslandi voru þrettán talsins og var þeim ásamt fylgdarliði og aðstandendum boðið á Bessastaði daginn eftir heimkomu þar sem þau fengu afhenda viðurkenningu frá frú Höllu Tómasdóttur forseta. Ísland kom ekki tómhent heim því Gunnar Guðmundsson keppandi í iðnaðarrafmagni hlaut brons verðlaun ásamt því að keppandi í matreiðslu og húsarafmagni fengu svokallaða medallion of excellence sem er veitt fyrir að ná 700 stigum.