BL nýtir reglulega aðstöðu Iðunnar til að halda námskeið fyrir sölufólk, framlínufólk og tæknimenn. Samstarfið undirstrikar mikilvægi Iðunnar fyrir bílgreinar á Íslandi – þar sem fagmennska, þekking og símenntun fara saman.
Það var líf og fjör í húsakynnum Iðunnar í síðustu viku þegar BL hélt námskeið fyrir sölufólk, framlínufólk og tæknimenn vegna frumsýningar á nýjum Hyundai-bíl sem kynntur var um síðustu helgi. Markmiðið var að gefa starfsfólki tækifæri til að kynnast nýjungum bílsins, tækninni og þjónustulausnum áður en hann mætir viðskiptavinum.
BL hefur verið reglulegur gestur í Iðunni – nánast á tveggja vikna fresti eða að minnsta kosti mánaðarlega – þar sem fyrirtækið nýtir aðstöðuna til námskeiða og þjálfunar. Þar kemur saman fagfólk af öllum stigum fyrirtækisins: sölufólk, þjónustufulltrúar og tæknimenn.
Fulltrúi BL segir að það skipti miklu máli að fá starfsfólkið út úr hefðbundnu vinnuumhverfi:
„Þetta hvetur fólkið til að fara í lærdómsham. Hér í Iðunni er ró, enginn sími, engin truflun – bara lærdómur. Það hjálpar fólki að einbeita sér og átta sig á mikilvægi þess að vera vel undirbúinn,“ segir hann.
Þátttakendur taka undir þetta og segja að það skipti miklu máli að fá frið frá daglegu áreiti til að tileinka sér nýja þekkingu. „Fólk fattar alvarleikann og mikilvægi þess sem það er að læra,“ segir einn þátttakandi.
Sigurður Svavar Indriðason leiðtogi bílgreina í Iðunni bendir á að þetta fyrirkomulag skili mælanlegum ávinningi fyrir fyrirtæki:
„Það gerir gæfumun að fara á annan stað til náms. Þannig nær fólk betri fókus og meiri árangri. Þetta sjáum við aftur og aftur.“
Að sögn Sigurðar er þessi samstarfsvettvangur mikilvægur fyrir báða aðila. Með því að bjóða bílaumboðum að nýta aðstöðu sína fylgist Iðan grannt með þróuninni í bílgreinum, nýrri tækni og þörfum markaðarins.
„Þetta er gagnkvæmt lærdómsferli. Við sjáum breytingarnar í rauntíma og getum miðlað þekkingunni áfram í okkar eigin fræðslu. Þarna skapast líka verðmæt tengsl við markaðinn,“ segir Siggi.
Það er því ekki að ástæðulausu að Iðan er orðin mikilvægur bakhjarl bílgreina á Íslandi – þar sem fagmennska, þekking og samstarf ganga hönd í hönd.