Lilja Diljá Ómarsdóttir er nýsveinn í vélvirkjun og nýkomin úr krefjandi en skemmtilegu starfsnámi í Essen í Þýskalandi. Hún segir frá ævintýrum sínum í nýjasta hlaðvarpi Ævintýra í Evrópu.
Lilja Diljá fór í þriggja mánaða Erasmus + starfsnámsferð til borgarinnar Essen þar sem hún starfaði hjá fyrirtæki sem sinnir fjölbreyttum verkefnum á sviði málmiðnaðar í borginni og nágrenni hennar.
Þótt margt í vinnunni hafi verið henni kunnuglegt var skipulagið á vinnustaðnum á köflum frábrugðið því sem hún átti að venjast.
„Það var mjög margt kunnuglegt en þarna var maður sem hjálpaði mér mest – hann sá bara um að sjóða. Hann mátti ekki gera neitt annað. Það var punktað fyrir hann,“ útskýrir hún og bendir á að verkaskiptingin hafi verið skýr og sérhæfð.
Vinnustaðurinn var nokkuð stór og oftast voru um fimm manns að störfum á verkstæðinu í einu. Lilja Diljá var eina konan á verkstæðinu.
Málmiðnaðurinn er víða talinn karlægur heimur og Lilja Diljá viðurkennir að hún hafi fundið fyrir stressi fyrsta daginn.
„Ég var rosalega stressuð þegar ég labbaði þarna inn fyrst. Þetta voru mest karlmenn – og fullorðnir karlmenn. Ég var stressuð að hitta þá.“
En kvíðinn reyndist ástæðulaus.
„Þeir hjálpuðu mér með allt sem ég þurfti og tóku virkilega vel á móti mér,“ segir Lilja Diljá og segir þá reyndar hafa sýnt sér ómetanlegan stuðning og hún hafi komið heim sem virkilega öflugur fagmaður.