Föstudaginn 16. maí sl. stóð Iðan fyrir skemmtilegum fræðsluviðburði undir yfirskriftinni Málmsuðudagurinn.
Það muna kannski einhverjir eftir Málmsuðudeginum sem var árlegur viðburður og samstarfsverkefni Iðunnar og Málmsuðufélags Íslands. Dagurinn á sér langa og góða sögu og þótti okkur hjá Iðunni tímabært að endurvekja hann.
Málmsuðudagurinn er viðburður sem hentar fagfólki sem vinnur við málmsuðu, í stálsmiðjum, vélaverkstæðum. Hann hentar líka öllum öðrum sem hafa óbilandi áhuga á faginu og tengdri tækni.
Málmsuðudagurinn fór fram í húsakynnum Iðunnar fræðsluseturs að Vatnagörðum 20 og var haldinn í samstarfi við Veldix. Á staðnum var boðið upp á fræðsluerindi, kynningar á tækjabúnaði sem tengist málmsuðu ásamt því að Torfærubíllinn Kúrekinn var sýnis. Þá mætti Snjólaug Lúðvíksdóttir til okkar með stutt uppistand.
Markmiðið með Málmsuðudeginum er að kynna nýjustu þróun í málmsuðutækni og efla tengsl og þekkingu meðal þeirra sem starfa á þessu sviði. Óhætt er að segja að það hafi tekist með miklum ágætum föstudaginn síðastliðinn.
Sjáumst á næsta ári.