„Mér finnst ég vera mikið fróðari um bjór og bjórgerð eftir að hafa farið til Þýskalands,“ segir Davíð Stefánsson framreiðslunemi um skemmtilegt starfsnám í Berlín.
Davíð, 19 ára nemi á veitingastaðnum Monkeys í Reykjavík, fór í september síðastliðnum í fjögurra vikna starfsnám til Berlínar með Erasmus-styrk fyrir tilstilli Iðunnar fræðsluseturs.
Þar starfaði hann hjá Lemke, þekktri bruggsmiðju og veitingastað í borginni og fékk einstakt tækifæri til að dýpka þekkingu sína á þjónustu og bjórgerð í landi sem er þekkt fyrir sterka bjórmenningu.
Áhugi Davíðs á Þýskalandi og menningu landsins átti stóran þátt í ákvörðuninni. Hann segir tækifærin til að læra um bjórgerð þar vera mun fjölbreyttari en á Íslandi. „Ég hef alltaf sýnt bjórgerð mikinn áhuga en það er mjög takmarkað sem maður getur lært á Íslandi miðað við Þýskaland,“ segir hann.
Að hans mati var starfsnámið dýrmæt viðbót við námið og gaf honum traustan grunn sem hann nýtir nú daglega í starfi sínu.
Fólk spjallaði úti á götu
Dvölin í Berlín hafði einnig áhrif á hann persónulega. Davíð bjó einn í borginni og segir það hafa aukið sjálfstraust sitt og opnað hugann fyrir því að búa og starfa erlendis í framtíðinni. Hann upplifði jafnframt mikinn mun á samskiptum fólks og fann að fólk í Berlín væri opið, hjálpsamt og fljótt að hefja samræður við ókunnuga. „Ég lenti oft í því að spjalla við fólk úti á götu, sem gerist ekki mjög oft hérna á Íslandi,“ segir hann.
Þegar hann lítur til baka lýsir Davíð reynslunni sem skemmtilegri, lærdómsríkri og ógleymanlegri. Hann hvetur aðra nemendur eindregið til að nýta sér Erasmus-tækifæri ef þau bjóðast. Að hans sögn er slíkt starfsnám einstök reynsla sem eflir bæði faglega og persónulega og eitthvað sem enginn ætti að láta fram hjá sér fara.