Röraverkpallar

Fyrir hverja:

Námskeiðið er fyrir alla sem ætla að setja upp röraverkpalla við byggingar og mannvirki.  Það námskeið er haldið í samræmi við ákvæði 16. gr. reglugerðar um röraverkpalla nr. 729/2018.

Markmið:

Tilgangur námskeiðsins er að stuðla að öryggi fólks í tengslum við notkun röraverkpalla, þar með talið starfsmanna sem starfa á slíkum pöllum eða í námunda við slíka palla, til að koma í veg fyrir að slys eigi sér stað.

Á námskeiðinu verður fjallað um:

• Lög, reglur/reglugerðir og staðla sem mikilvægt er að þeir sem vinna við uppsetningu og niðurtöku röraverkpalla kunni skil á.
• Mikilvægi þess að fyllsta öryggis sé gætt við uppsetningu röraverkpalla og að þátttakendur þekki helstu áhættur sem fylgja því að nota slíka palla, svo sem um vinnu í hæð og almennar öryggiskröfur.
• Gerð áhættumats en í vinnuverndarlögunum eru ákvæði um að atvinnurekandi beri ábyrgð á því að gert sé sérstakt skriflegt áhættumat þar sem áhætta í starfi er metin með tilliti til öryggis og heilsu starfsmanna.
• Leiðbeiningar og merkingar röraverkpalla.

Að loknu námskeiði á nemandi að:

• Kunna skil á aðalatriðum laga og reglugerða um röraverkpalla.
• Þekkja hættur við uppsetningu röraverkpalla og almennar öryggiskröfur við slíka vinnu.
• Geta gert áhættumat um uppsetningu röraverkpalla.
• Þekkja leiðbeiningar og merkingar.

Annað:

Námskeiðið er bæði bóklegt og verklegt. Í lok námskeiðs taka nemendur krossapróf, lágmarkeinkunn til að standast prófið er að svara 80% spurninga rétt.