Galdurinn á bak við hina fullkomnu Ramen-skál

Fyrir hverja:

Námskeiðið er ætlað matreiðslumönnum, kokkum, starfsfólki í eldhúsum og öðru fagfólki í veitingageiranum sem vill dýpka þekkingu sína á ramen og asískri matargerð.

Markmið:

Að þátttakendur öðlist hagnýtan skilning á grunnþáttum ramen og geti nýtt aðferðirnar við gerð soða, tare, núðla, meðlætis og samsetningu ramen-skála í faglegu eldhúsi.

Lýsing:

Ramen er mun meira en núðlusúpa. Hann er einn þekktasti réttur japanskrar matarmenningar þar sem nákvæmni, jafnvægi og virðing fyrir hráefninu ráða úrslitum. Hver skál byggir á vandlega þróuðum soði, tare sem skapar einkennisbragðið, rétt soðnum núðlum og áleggi sem vinnur saman í fullkomnu bragðjafnvægi.

Á þessu verklega námskeiði læra þátttakendur að byggja ramen upp frá grunni með þeim aðferðum sem notaðar eru í japönskum ramen-eldhúsum. Farið er yfir allt ferlið, frá vali á hráefnum og gerð „miso“, „shio“ og „shoyu tare“ yfir í „tori paitan“-soð, vegan-soð, núðlur, „chashu“ svínasíðu og klassískt álegg. Jafnframt er lögð áhersla á samsetningu, framsetningu og vinnuflæði sem tryggir stöðug gæði í faglegu eldhúsi.

Á námskeiðinu verður fjallað um:

• Helstu hráefni í ramen
• Miso tare, shio tare og shoyu tare marineringar
• Tori paitan-soð
• Vegan ramen-soð og bragðuppbyggingu
• Ramen-núðlur og eiginleika þeirra
• Gerð „Chashu“ svínasíðu
• Olíur, egg og annað meðlæti
• Samsetningu ramen-skálar og bragðjafnvægi
• Verklegt vinnuflæði fyrir faglegt eldhús

Að loknu námskeiði á nemandi að geta:

• Útbúið þrjár helstu tegundir tare
• Gert tori paitan-soð og vegan ramen-soð
• Unnið með ramen-núðlur og skilið eiginleika þeirra
• Eldað og undirbúið chashu svínasíðu
• Sett saman vandaða og samræmda ramen-skál
• Nýtt aðferðirnar í faglegu veitingaeldhúsi

Aðrar upplýsingar:

Kennari námskeiðsins er Kunsang Tsering Tamang, meðeigandi og yfirkokkur Ramen Momo á Íslandi. Hann sérhæfir sig í ekta asískri matargerð og stundaði nám í ramen og japanskri matargerðartækni í Osaka í Japan.

Á starfsferli sínum hefur Kunsang þróað uppskriftir, þjálfað matreiðslumenn og stýrt faglegum eldhústeymum með áherslu á hefðbundnar aðferðir sem aðlagaðar eru að nútíma veitingarekstri. Í kennslu sinni leggur hann sérstaka áherslu á hagnýta færni, nákvæm vinnubrögð, stöðug gæði og þau faglegu vinnubrögð sem einkenna öflug eldhús.

Tungumál: Enska

Snið: Aðallega verkleg þjálfun

Lengd: 2 dagar, 4 klukkustundir á dag